15O, un ano despois (II): Baiona

O lume en Baiona chegou a escasos metros do casco urbano, pois realmente se queimou todo o bosque desrganizado e fincas sen limpar que arrodean totalmente a vila, e actualmente segue a formar parte da súa paisaxe xunto ao verde que trata de medrar entre o queimado

Baiona foi un dos concellos da área de Vigo máis afectados nos incendios do 15 de outubro, mais non polo factor da superficie total calcinada, senón polo feito de que practicamente toda a vila viuse cercada polo lume, e as chamas chegaron a ameazar numerosos edificios, casas e urbanizacións. O principal problema que ten o municipio de Baiona respecto a isto é que boa parte dos terreos que foron queimados o pasado outubro son como dixen, monte ou fincas sen ordenar, e aínda por riba algúns figuran no polémico PXOM aprobado en 2014 polo Partido Popular como solo urbanizábel, seguindo o modelo de vila turística de verán que algúns políticos queren promover coma un negocio. O problema vése agravado polas urbanizacións de recente construción que están habitadas precisamente a carón deste monte desordenado de próxima edificación, ás que o lume estivo a punto de queimar. E o panorama que atopamos a día de hoxe non parece indicar que houbese un cambio de prantexamento no concello de Baiona, pois o certo é que as tareas post-incendio neste concello limitáronse a botar palla as semanas posteriores ao incendio para evitar a erosión. Pouco ou nada máis se fixo. Isto contrasta fortemente coas actuacións levadas a cabo para replantar o monte en Chandebrito, como veremos noutro artigo.

Durante a mañá do 12 de outubro, cando a situación aínda non era tan mala no resto da comunidade, un pequeno incendio na contorna da Virxe da Rocha facía saltar todas as alarmas no concello baionés. O lume, que dende o primeiro momento se sospeitou que fora provocado, xerou unha gran fumareda por enriba da vila de Baiona, e causou un gran susto aos seus veciños. Este incendiou conseguiuse controlar rapidamente e apenas afectou a unha pequena superficie arborada nas inmediacións da Virxe da Rocha. Esta mesma zona sufriu outro incendio provocado na madrugada do 14 ao 15 de outubro que afectou a un pouco máis de monte. Ás sete da mañá dese mesmo día volvía reactivarse, para inquedanza dos baioneses, o lume na zona da Virxe da Rocha, desta vez afectando ao hotel Rompeolas e chegando a estar moi próximo ao IES Primeiro de Marzo.

O caseto do baño instalado na contorna da Virxe da Rocha tivo que ser reposto debido a que prendeu enteiro 

O mesmo 15 de outubro tivo lugar o importante incendio que quedou ás portas dalgunhas urbanizacións e a escasos metros do casco urbano da vila. Este incendio prendeuse na zona de Baíña e doadamente atravesou a AG57 no seu primeiro tramo de vía rápida e queimou toda a superficie verde que arrodea a vila, chegando incluso a afectar a un par de vivendas na parte alta de Baiona.
Este incendio obrigou a desaloxar varias urbanizacións e chegou ata o grupo de vivendas da Anunciada, moi próximo á súa vez ao casco vello baionés.

Con todo, Baiona foi dos municipios da área de Vigo máis castigados nos incendios de outubro, máis aínda houbo peores incendios que deron de falar aquel fatídico outubro de 2017...