As rúas con nomes de provincias no Calvario (*)

Vista da rúa Andalucía

Así como na zona da Doblada hai rúas con nomes de paxaros (como vimos no anterior artigo, en novembro) no propio barrio do Calvario tamén hai un caso semellante. Trátase das rúas con nomes de rexións españolas, e digo rexións porque na época na que se deron nome a estas rúas inda non existían as autonomías.

A maior parte destes camiños carecían de nome oficial nos tempos da posguerra e a ditadura (se ben algúns podían ter unha denominación toponímica previamente ou unha designación republicana); e outras eran vías novas que se ían abrindo, e por iso decidiron chamalas por nomes de rexións (hoxe comunidades ou provincias).

Algúns exemplos son as rúas Badaxoz, Asturias, Valladolid, Vizcaia, Burgos, Soria, Palencia, Segovia, Logroño. Como excepcións á regra de rexións atopamos a rúa de Monforte de Lemos, (nomeada así xa nun rueiro do ano 54 sen motivación aparente) e a rúa de Numancia e tódalas súas travesías (dedicadas á antiga cidade celtíbera próxima á actual Soria).

Con topónimos preexistentes podemos destacar ás rúas Extremadura e Andalucía. A primeira levaba o nome oficial de Riomao, topónimo orixinal da gran parte de Lavadores que ocupa hoxe o que coñecemos pol'O Calvario, e na II República tivo o nome de Triunfo. Pola súa banda, a rúa Andalucía era coñecida anteriormente pola do Estanco de Marallas, un señor moi argalleiro.

E outras das rúas con nomes de rexións no barrio do Calvario son Cataluña (os republicanos lavadoreños chamárona Pablo Iglesias e durante a guerra levou o nome de Capitán Carreró, en “honra” ao principal sublevado en Vigo), León (na república foi chamada Manuel Llaneza, probabelmente un sindicalista ao que quixeron homenaxear, e na guerra chamouse Comandante Felipe Sánchez), Aragón (ao igual que ás anteriores, Capitán García Hernández para os republicanos, José Calvo Sotelo para os sublevados), e Toledo (desta última cabe destacar que en realidade non se pensou como unha rexión, senón que durante todo o franquismo e ata pasada a Transición homenaxeaba á batalla do Alcázar de Toledo, mais en 1981 decidiron eliminala connotación franquista das rúas, polo que aproveitando a circunstancia das rexións pasou a chamarse polo seu nome actual).

Por certo, os nomes de Carreró e Felipe Sánchez quitáronse tamén porque, igual que pasou con outras rúas, ao fusionarse os concellos de Lavadores e Vigo producíanse duplicidades nos nomes (en Vigo Carreró era a actual Porta do Sol e Felipe Sánchez o actual Areal).

(*) Artigo publicado no exemplar número 6 (xaneiro de 2019) do periódico veciñal Somos Calvario, editado pola asociación de veciños do Calvario.