Arte no Vitrasa

Como xa vimos en ocasións previas (e seguimos vendo), o autobús é un medio de transporte que forma parte da paisaxe urbana da nosa cidade, polo que é unha canle que pode ser moi efectiva para facer chegar unha mensaxe publicitaria á poboación. E é por isto polo que canto máis rechamante sexan os anuncios integrais máis éxito terán, posto que esta estratexia de aproveitar os buses como un soporte publicitario máis está cada vez máis de moda.

De todos os xeitos, os buses tamén poden servir de soporte cultural e incluso para exposicións por dentro, e isto vale non só para axudar a promocionar unha causa non publicitaria de cara aos usuarios que suben ao bus, senón tamén para "tunear" os buses e darlles uns motivos propios a cada un e que non sexan todos iguais (entre modelos, claro) por dentro. As fotos que ilustran o artigo pertencen ao bus 6140, no que como se pode ver se pode desfrutar durante un traxecto urbano nel da arte do pintor Laxeiro ao tempo que se vai enxergando as vistas polas cristaleiras.

No caso dos anuncios, o proceso habitual é que os promotores da campaña contrátana á axencia de publicidade de Vitrasa (ExterionMedia) e expresan o seu interés en que o anuncio circule en determinadas liñas, ben por motivos de cantidade de uso desa/s liña/s ou polos lugares nos que teña paso. Entón, a axencia consulta ao departamento de operacións da empresa (que xunto co taller controla as asignacións de buses en servizos) por uns buses cincretos que estean asignados nesas liñas e que estean dispoñíbeis para un novo vinilado. Aínda así, nunca se garantiza que o anuncio vaia estar durante toda a súa vixencia na mesma liña, xa que como é sabido, un bus pode rotar a outros servizos ocasionalmente aínda que estea asignado nunha liña.

Pola contra, semella que cando se trata de decorar os buses para divulgar cultura, arte ou outro tipo de iniciativas, escóllense aos buses con menor afluencia de pasaxeiros, destinados nas liñas menos rendíbeis, como é o caso do mesmo 6140 (micro con xa de por si menos prazas ca un bus normal de 12 metros destinado a liñas de moi pouca afluencia e que mesmo ás veces circula baleiro na C2, situación na que puidemos sacarlle estas fotos).

Existen outros buses con este tipo de decoracións internas, ben sexa para exhibir os resultados do xa tradicional concurso de postais do Nadal para escolares de Vitrasa, ou a difusión da reedición da obra de Xohana Torres "Adiós María", mais na miña opinión deberíase de promover moito máis este tipo de campañas e dende logo non só reservalas para os autobuses nos que non as ve ninguén...